कुएँ पै नीर भरु थी।
मैनै मिलगी शीतला माई
हे मैनै मिलगी शीतला माई।
मैनै एक घुट नीर पिलादे।
मै तो तैनै देख के आई हे मैनै मिलगी शीतला माई।
मैनै मांज टोकनी भर ली।
मै लोटा भर के लाई हे मैनै मिलगी शीतला माई।
पोहचे पै आसुं टपका।
बेबे किस विपदा मै रोई हे मैनै मिलगी शीतला माई।
बेबे के दुख सासं ननद का।
के बयाहे पति नै सताई हे मिलगी शीतला माई।
बेबे ना दूख सासं ननद का।
ना बयाहे पति नै सताई हे मिलगी शीतला माई।
बेबे पीला ओढा ना पिलिया।
कदे जलवा पूज कै ना देखा हे मेरे कर्मा की करड़ाई।
बेबे इबकै नौराते आवै।
तु गुड़गांवे मै आइये हे तेरी कर दु मन की चाही।
बेबे आठै नै पुड़े तारिये।
नोमी नै जलवा पुजिये हे तेरी कर दु मन की चाही।
बेबे के सै नाम तुम्हारा।
तु कौनसे गाँव तै आई हे मैनै मिलगी शीतला माई।
बेबे गुड़गांवे तै आई।
मेरा नाम शीतला माई हे तेरी कर दु मन की छाही।
धन धन हो शीतला माई।
म्हारे कुल की बेल बढाई हे धन धन हो शीतला माई।
तैने मेरी लाज बचाई हे धन धन हो शीतला माई।
0 Comments