गऊमाता चर के आई।
मैंने भाज जेवड़ा बांधया हे भगवान
राम तेरी माया।
मैंने खल तै हे स्यानी भेई।
एक कुण्डा चून मिलाया हे भगवान
राम तेरी माया।
मैंने भाज के नयाना लाया ।
मैंने गज गज दूध निकाला हे भगवान
राम तेरी माया।
मैंने हारी रै चुल्हे लिपे।
मैंने खीर रांधनी धर दई हे भगवान
राम तेरी माया।
मैंने सारा ऐ कुनबा बुलाया।
मैंने अपनी सास ना बुझी हे भगवान
राम तेरी माया।
मेरा सारा ऐ कुनबा जीमा।
मेरी सासु झुक झुक देखे हे भगवान
राम तेरी माया।
एक बाबा हे मांगन आया।
बेबे तेरा भोग ना लागया हे भगवान
राम तेरी माया।
बाबा फेर तै खीर बनाउ।
मै अपनी सासा जिमाउ हे भगवान
राम तेरी माया।
बाबा कुछ तो जत्न बता दे।
मैंने अपनी सास ना बुझी हे भगवान
राम तेरी माया।
बेबे इब कुछ जत्न नहीं सै।
कीड़े की कुण्ड मै जावै हे भगवान
राम तेरी माया।
थम सुन लो हे सखियों सारी।
सासु नै राम समझियो हे भगवान
राम तेरी माया।
0 Comments