भीड़ पड़ी मै कोए ना साथी हे सारे छोडै साथ
राम मेरे पै रटा ना जाता हे साच बता दु बात।
पीहर मै हे मेरै माता कोन्या।
अहे मेरा बीर बुलाता कोन्या।
मात पिता हे मेरे गए स्वर्ग मै ना सिर पै
किसी का हाथ राम मेरे पै रटा ना जाता
हे साच बता दु बात।
अहे इसी हो गई डुबा ढेरी।
अहे मेरी खाट कुण मै गेरी।
आता जाता कोई ना दिखै हे कैसे कटे
दिन रात राम मेरे पै रटा ना जाता
हे साच बता दु बात।
अहे मेरे बहु बेटे बतलाए।
अहे आश्रम का जिक्र चलावै।
वृद्धाश्रम छोडेंगे उड़ै सै बुढिया का साथ
राम मेरे पै रटा ना जाता हे साच बता दु बात।
नहाले धोले सिर करवाले ।
सासु जी तु हलवा खाले।
गाडी के मै बैठ लिए तु करले आखिरी बात
राम मेरे पै रटा ना जाता हे साच बता दु बात।
अहे गाडी मै बैठ के रोई।
अहे मैंने कमा के जिंदगी खोई।
बूढा भी कुछ बोलया कोन्या हे पंचा मै पकड़ा
हाथ राम मेरे पै रटा ना जाता हे साच बता दु बात।
अहे मै आश्रम के मै आई।
अहे मै चारों तरफ लखाई।
पाट कालजा आवै सै हे जब दिखी आश्रम
की खाट राम मेरे पै रटा ना जाता हे साच बता दु बात।
अरे बेटा मतना छोड के जावै।
अरे बेटा मेरा दिल घबरावै।
बडे दुखा तै पाला था रै तु करले बात नै याद
राम मेरे पै रटा ना जाता हे साच बता दु बात।
कहवै भगतनी हे हाथ जोड़ लो।
राम तै मुखड़ा मतना मोड़ियो।
कर्म करा हुआ आगे आवै हे मालिक देगा साथ
राम मेरे पै रटा ना जाता हे साच बता दु बात।
भीड़ पड़ी मै कोए ना साथी हे सारे छोडै साथ
राम मेरे पै रटा ना जाता हे साच बता दु बात।
0 Comments