ठाके झोला बाबा चालया।
माई भिक्षा घाल दिये हे भगवान राम तेरी माया।
के बाबा ओ तैनै भैंस चराई।
के तैनै हलिया जोड़ी सै हे भगवान राम तेरी माया।
ना माई हे मैनै भैंस चराई।
ना मैनै हलिया जोड़ी सै हे भगवान राम तेरी माया।
सुबह सुबह हे माई अलख जगाया।
तो बासी कुसी घाल दिये हे भगवान राम तेरी माया।
बासी तो बाबा बालक खा गए।
ताती हमनै पोई ना हे भगवान राम तेरी माया।
एक पड़ोसन खड़ी सुनै थी।
के बाबा म्हारे आ जाइये हे भगवान राम तेरी माया।
कहो तो बाबा थारी तपु रसोई।
कहो तो ठंडा मंगवादु हे भगवान राम तेरी माया।
पहला तो हे माई नाहन संजोवा।
पीछे भोजन खावांगे हे भगवान राम तेरी माया।
नाहया धोया बाबा तिलक लगाया।
तो धोती कड़ै सुकाउ हे हे भगवान राम तेरी माया।
भीतर तै हे वा गोटा लयाई।
गोटा खोल बिलगनी बंधाई।
तो बाबा अड़ै सुका दे हो हे भगवान राम तेरी माया।
धोती माह तै पानी टपकै।
यो बन गए मोहर अशरफी हे हे भगवान राम तेरी माया।
जुते काढ के ठोकर मारी।
तो बन गए महल अटारी हे हे भगवान राम तेरी माया।
वाहे पड़ोसन भागी आई।
यो धन कड़े तै लयाई हे हे भगवान राम तेरी माया।
तैनै दुदकारा मैनै अपनाया।
यो धन उड़ै तै लाया हे हे भगवान राम तेरी माया।
एकबार तो हे बेबे बाबा नै बुलादे।
सतपकवान बना दु हे हे भगवान राम तेरी माया।
बाबा नहीं हे वो कृष्ण जी था।
हर कि पैड़ी पै चढ गया हे हे भगवान राम तेरी माया।
0 Comments