छम छम करती फिरु बगड़ मै पिलंग भरै
मेरा जेठ बहु हे मूह देखुंगा।
एक बार पल्ला ऊपर करदे कंठी दु घड़वाए
मोटे मोटे मणिया की।
दस दिन की हे पति छुट्टी आया कंठी का भेद
बताए कड़ै घड़वाई सै।
मैनै तो पिया बेरा कोन्या पिता अपने तै पुछ
कड़ै घड़वाई सै।
हुक्का पीवता पिता तै बुझै कंठी का भेद
बताए कड़ै घड़वाई सै।
मैनै तो बेटा बेरा कोन्या माता अपनी पुछ
कड़ै घड़वाई सै।
दूध बिलोवती माता तै बुझै कंठी का भेद
बताए कड़ै घड़वाई सै।
मैनै तो बेटा बेरा कोन्या भाई अपने तै पुछ
कड़ै घड़वाई सै।
दूध काढता भाई तै बुझै कंठी का भेद
बताए कड़ै घड़वाई सै।
मैनै तो भाई बेरा कोन्या ब्याही अपनी तै पुछ
कड़ै घड़वाई सै।
सोटी लेके पीछे हो लिया कंठी का भेद
बताए कड़ै घड़वाई सै।
जेठे नै घड़ाई मै गिरकाई आप गए परदेश
इब क्यु रोवै सै
0 Comments