बालम छुट्टी आया मै दुसर लेके आई।
तीन दिन होगे बालम कै नहीं थायाई।
जब मेरे बालम नै बात बनाई।
गौरी पानी लाइये प्यास लग आई।
जब मैनै बाहरने तै ननद बुलाई।
हेरी पानी मांगै ननद तेरा भाई।
जब मेरी ननदल नै ठाया सै लोटा।
बालम छो मै आया दिखावै मैनै सोटा।
बहु नहीं आई बहु रै कोई टोटा।
जब मेरे बालम नै बात बनाई।
गौरी रोटी लाइये भूख लग आई।
जब मैनै बाहरने तै सास बुलाई।
हेरी रोटी मांगै ननद का भाई।
जब सासड़ नै ठाई सै थाली।
बालम छो मै आ रहा बैकै हे मैनै गाली।
बहु नहीं आई बहु रै कोई चाली।
जब मेरे बालम नै बात बनाई।
गौरी सिर भड़कै मेरै चढै रही ताप न्युवाई।
तेरा सिर भड़कै मेरा हो दिल धड़कै।
तड़के चली जांगी आ रहा सै बडा भाई।
बेसक चली जाइये मैनै कोन्या चाहिए लुगाई।
0 Comments