मै दमदम महला चढ गई पाछे
तै कृष्ण चढ गया।
अहे मैंने चुन्दड़ दिया बैगाए
हार खुटी कै टांगया हे।
आधी तै रात ढली थी कृष्ण नै चोरी करी थी।
अहे मेरा इसा सुनहरी हार हार
गुजरी नै दे दिया हे।
मै दमदम तलै उतराई मैंने आके सास जगाई।
अहे मेरा इसा सुनहरी हार हार
गुजरी नै दे दिया हे।
तु सुन ले राधा प्यारी कृष्ण तै ना
करिए लड़ाई।
अहे तेरा ईसा सुनहरी हार हार
तेरा और घड़ा दयांगा।
मै ठाके टोकनी चाली रस्ते मै
गुजरी मिल गई।
अहे गोकुल की गुजरी चार
ये जल भरने नै आई हे।
तु सुनले गुजरी प्यारी मैंने बात
बतादे सारी।
अहे तेरा ईसा सुनहरी हार हार तेरा
किसने घड़ाया हे।
तु सुनले राधा प्यारी तैनै बात
बता दु सारी।
अहे सुसरे कै घनी लाडली हार
सुसरे नै घड़ाया हे।
गुजरी नै घड़ा डुबोया मैंने इधर
उधर नै देखा।
अहे चटके तै तोड़ लयाई हार गुजरी
नै शोर मचाया हे।
गोकुल मै कृष्ण बैठा वो बैठा बैठा हसैं।
अहे गुजरी की बंधावै धीर हार तेरा
और घड़ा दया हे।
थम सुन लो कृष्ण प्यारे राधा के
देखो नजारे।
अहे चटके तै तोड़ लयाई हार या
गुजरी खड़ी लखावै हे।
0 Comments