पूर्णमल तु क्यों खड़ा सै के मतलब

पूर्णमल तु क्यों खड़ा सै के मतलब सै मेरे तै।

हे मेरी मौसी अर्ज करु सु हाथ जोड़ के तेरे सै।

पूर्णमल इस बेले के मै कब का दूध सिला राखा।

हे मेरी मौसी मै ना पीता आधा जहर मिला राखा।

पूर्णमल रै महला के मै शतरंग सेज बिछा राखी।

हे मेरी मौसी मै ना सोता मेरे पिता नै ब्याह राखी।

पूर्णमल रै भीत पड़ैगी डाटी जा तो डाट लिये।

हे मेरी मौसी डटती कोन्या दिल अपना नै डाट लिये।

पूर्णमल रै घड़ी बनुंगी चाबी देके बांध लिये।

हे मेरी मौसी रेल बनुंगा टिकट कटा के बैठ लिये।

बाहरा तै हे वो राजा आया रानी तो बेहोश पड़ी।

के रानी तेरा सिर भड़कै सै के तेरै काली नाग लड़ी।

ना राजा मेरा सिर भड़कै सै ना मेरै काली नाग लड़ी।

तेरा पूर्णमल हुया गाभरु लई आबरु तार मेरी।

रानी तो बतावन लागी राजा कै इतबार नहीं।

मरवा देगी पूर्णमल नै और दुसरा लाल नहीं।

बारहा मण का भारी पत्थर रानी नै सरकाय दिया।

 राजा का पूर्णमल तो रानी नै मरवाय दिया।