दरखत लम्बा बढ गया हे-हे मोड़ु तो मुड़ते कोन्या।
पति मेरा लोफर हो गया हे-हे समझाऊ समझता कोन्या।
सासं मेरी जत्न बतादे हे-हे तेरा बेटा लोफर हो गया।
बहु हे बेटा पढ़ के आवे हे-हे तु गज का घुंघट काढिये।
बहु हे बेटा रोटी मांगै हे-हे अलमारी कै ताला लगाइये।
बहु हे बेटा मारन चालै हे-हे वैके उलटा चार जचाइए।
लोफर पढ़ के आया हे-हे मैनै गज का घुंघट काढया।
लोफर नै रोटी मांगी हे-हे अलमारी कै ताला लगाया।
लोफर मारन चालया हे-हे मैनै उलटा चार जचाया।
गौरी रै मेरी साँच बतादे रै-रै तैनै किसनै जत्न बताया।
पिया हो मेरा साँच बतादूँ हो-हो थारी माँ नै जत्न बताया।
माता सबकी मरियो रै-रै उसनै अपना लाल पिटवाया।
सासु सबकी जियो हे-हे उसनै अपना लाल समझाया।
0 Comments