गुजरी गई थी जल भरबा नै।
कान्हा गऊ चरावै मेरा राम।
झालो ऐ मार गुजरी कान्हा हे बुलावै।
कान्हा घड़ो उठादे मेरा राम।
जब कान्हा वैनै घड़ो उठावै।
गुजरी नै गुठड़ो मरोड़ो मेरा राम।
रोवतो सुबकतो कान्हो घरनै आयो।
घाल खटोलों सोयो मेरा राम।
के कान्हा रै तेरा सिर भड़कै सै।
के तेरे ताप निवाई मेरा राम।
ना माता हे मेरो सिर भड़कै सै।
ना मेरे ताप निवाई मेरा राम।
मै तो हे माता गऊ चराऊ।
गुजरी गई थी जल भरबा नै।
झालो ऐ मार गुजरी कनै हे बुलायो।
गुजरी नै गुठड़ो मरोड़ो मेरा राम।
जै कान्हा रै तु मेरो जायो।
गुजरी तै बदलो लाइये मेरा राम।
बडली भावज को लहंगों मांगों।
छोटनी भावज की चुन्दड़ राम।
बडली भावज को कुरतो मांगो।
तो ओढ पहर कान्हो चालो मेरा राम।
चलते चलते कान्हो गुजरी कै आयो।
गुजरी को महल बतादो मेरा राम।
ऊचीं पैड़ी लाल किवाड़ी।
वो गुजरी को महल मेरा राम।
नीची नीची गुजरी दही ऐ घमोड़ै।
आजा मेरी बहना मिल ले ना।
मेरे तो कुल मै बरैन बाहन नहीं सै।
तु कठया तै आई मेरे राम।
तु काका की जीजी मै ताऊ की।
घना ऐ दिना का बिछटयोड़ा।
ताता सा पानी बेबे ठंडा हो सै।
आजा मेरी बहना नहा ले ना।
एक बात जीजी मै ऐ कहुंगी।
तेरी तो पिंडी जनु मर्दन की।
बालकपन मै जीजी माए मरी थी।
गऊ चराई दीन रात मेरी बाहन।
झाड़ा नै पिंडी पाड़ी मेरे राम।
हलवा पूरी सरस जलेबी।
आजा मेरी बहना जीमों ना।
एक बात जीजी मै ऐ कहुंगी।
तेरो तो गल्लो जनु मर्दन को।
बालकपन मै जीजी माए मरी थी।
बासा टुकड़ा खाया मेरे राम।
फूलों की सेज मोती झालर का तकिया।
आओ मेरी बहना पोढो ना।
जीजा नै हे जीजी खेत मै खंदा दे।
दोनों बहना सोवांगे।
दामन तार कान्हा खुटी कै टाक दिया।
चुन्दड़ तार बिलगनिया ओ राम।
हाथ मरोड़ो वैन गुठड़ो मरोड़ो।
गुजरी तै बदलो लियो मेरे राम।
हसतो खेलतो कान्हो घरनै आयो।
गुजरी तै बदलो लियो मेरे राम।
तु तो रै मेरो जायो।
गुजरी तै बदलो लायो मेरे राम।
0 Comments